На ўборцы збожжавых і зернебабовых культур у Мінскім раёне з'явіліся першыя камбайнеры-тысячнікі. 

У агракамбінаце «Ждановічы» імі сталі Віктар Стэльмах і Міхаіл Саладуха.

Імёны гэтых майстроў жніва вядомыя за межамі роднай гаспадаркі. Яны неаднаразова выходзілі пераможцамі раённага, абласнога і рэспубліканскага спаборніцтваў, былі ўдзельнікамі рэспубліканскага фестывалю-кірмашу працаўнікоў вёскі "Дажынкі". У гэтым годзе Віктар Васільевіч і Міхаіл Уладзіміравіч не змянілі сваёй шматгадовай звычцы. З пачатку ўборкі яны ўдала ўпісаліся ў рытм гарачай пары і ўжо паспелі выдаць з бункераў камбайнаў больш чым па адной тысячы тон збожжа новага ўраджаю. 

Пераможцаў жніва павіншавалі прадстаўнікі ўпраўлення сельскай гаспадаркі і харчавання Мінскага райвыканкама, а таксама райкам прафсаюза работнікаў аграпрамысловага комплексу. Ім уручаны падзячныя пісьмы і каштоўныя падарункі.